अत्यधिक गर्मीका कारण कावासोती नगरपालिकाभित्रका विद्यालयहरू बन्द

तिर्थराज काफ्ले 
कावासोती, जेठ २८— कावासोती नगरपालिकाले अत्यधिक गर्मीका कारण बालबालिकाको पठनपाठनमा असर परिरहेको भन्दै नगरपालिका क्षेत्रभित्रका सम्पूर्ण विद्यालयहरूमा गर्मी विदा दिने निर्णय गरेको छ।

नगर शिक्षा शाखाले आज जारी गरेको सूचनामा जेठ २९ गतेदेखि ३० गतेसम्म दुई दिन विद्यालय बन्द रहने उल्लेख गरिएको छ। नगरभित्रका सामुदायिक तथा संस्थागत विद्यालयहरूमार्फत सञ्चालन हुने कक्षा गतिविधिमा गर्मीका कारण पठनपाठन र स्वास्थ्यमा प्रतिकूल असर परेको भन्दै गर्मी विदा स्वरूप यो निर्णय लिएको नगर शिक्षा अधिकारी हेमचन्द्र पौडेलद्वारा हस्ताक्षरित सूचनामा जनाइएको छ।