पुनरावलोकन तथा अनुभव आदान–प्रदान कार्यक्रम देवचुलीमा

ज्ञानु पंगेनी , देवचुली, फागुन ७
पोषणमैत्री स्थानीय शासन कार्यान्वयनलाई प्रभावकारी बनाउने उद्देश्यले सञ्चालन गरिएको ‘न्यूटिलर्न परियोजना’ अन्तर्गत प्रशिक्षक प्रशिक्षणमा सहभागीहरूको पुनरावलोकन तथा अनुभव आदान–प्रदान कार्यक्रम बिहीबार देवचुलीमा सम्पन्न भएको छ ।
जागृति बाल तथा युवा सरोकार नेपालको आयोजना, देवचुली नगरपालिकाको समन्वय तथा क्यानालनको सहयोगमा सञ्चालित उक्त परियोजना पोषणसम्बन्धी व्यवहार परिवर्तन र स्थानीय तहमा पोषणमैत्री नीतिगत अभ्यास प्रवद्र्धन गर्ने लक्ष्यसहित अघि बढाइएको हो ।

ghiring

कार्यक्रममा प्रशिक्षक प्रशिक्षणमा सहभागी महिला स्वास्थ्य स्वयंसेविका, विद्यालयका शिक्षक, जनप्रतिनिधि तथा सम्बन्धित सरोकारवालाबीच हालसम्म सम्पन्न कार्यहरूको समीक्षा, अनुभव आदान–प्रदान, देखिएका समस्या–चुनौतीको विश्लेषण तथा भावी रणनीतिबारे सुझाव संकलन गरिएको थियो ।
सहभागी महिला स्वास्थ्य स्वयंसेविकाहरूले विद्यालयको दिवा खाजा कार्यक्रमको नियमित अनुगमन गर्दै सन्तुलित र पोषणयुक्त खानपानबारे अभिभावक तथा विद्यार्थीमा सचेतना अभिवृद्धि गर्ने कार्यलाई प्राथमिकता दिएको जानकारी गराउनुभयो । उहाँहरुले कुपोषण न्यूनीकरणका लागि समुदायस्तरमा सचेतना प्रदान गर्ने र लोखाजोखा राख्ने काम गरेको जानकारी गराउनुभयो । भने शिक्षकहरूले विद्यालय परिसरभित्र जंक फुड ( पत्रु खाना )को प्रयोग निरुत्साहित गर्न सचेतनामूलक अभियान सञ्चालन गरिएको बताउनुभएको थियो । परियोजना लागू भएका विद्यालयहरुमा शिक्षक तथा विद्यार्थी सम्मिलित क्लबहरु मार्फत जंक फुड निषेध अभियान नै सञ्चालन गरि गेटमै जाँच गर्ने , विद्यालयभित्र पस्नै नदिनेसम्मका काम गरिएको बताउनुभएको थियो । यसैगरी करेसाबारी निर्माण गरि खाजामा प्रयोग हुने तरकारीहरु उत्पादन गर्ने कार्यमा समेत जोड दिएको बताउनुभएको थियो ।
जनप्रतिनिधिको तर्फबाट देवचुली वडा नं. ७ की अध्यक्ष भूमिसरा आलेले आफूले प्राप्त गरेको ज्ञानलाई सम्कन्धित कार्यक्रमहरुमा जानकारी गराइ सचेत बनाउने काम गरेको बताउनुभयो ।
कार्यक्रममा संस्थाका महासचिव दीपक शर्मा, दीपक बस्याल, रेजिना घर्ती लगायतले सहजीकरण गर्नुभएको थियो ।