बाघको आक्रमणमा परि एक व्यक्ति घाइते

नवलपुर , असार २७ –
नवलपुरको हुप्सेकोट गाउँपालिका वडा नं. १ बेलुवामा बाघको आक्रमणबाट एक व्यक्ति घाइते भएका छन्।

आज बिहान करिब ६:५० बजे त्रिकोण सामुदायिक वनमा घाँस काटिरहेका ३८ वर्षीय दिपेन्द्र शेर्पुन्जालाई बाघले आक्रमण गरेको प्रहरीले जनाएको छ। बाघको आक्रमणबाट उनको दाहिने हातको पाखुरा, छातीको दाहिने भाग र ढाडमा चोट लागेको छ।

घाइते शेर्पुन्जालाई उपचारका लागि मध्यबिन्दु प्रादेशिक अस्पताल, डण्डा लगिएको छ। हाल उनको अवस्था मध्यम रहेको जनाइएको छ।

आक्रमणपछि बाघ पुनः जंगलतर्फ फर्किएको जानकारी स्थानीयवासी र सुरक्षाकर्मीले दिएका छन्।
यस क्षेत्र नजिकै मानव र बाघबीचको द्वन्द्व बढ्दो रहेका कारण सुरक्षाको लागि सतर्कता अपनाउन सम्बन्धित निकायलाई स्थानीयले आग्रह गरेका छन्।