विद्यार्थीद्वारा उत्पादन गरिएको तिल बिक्रीमा

तिर्थराज काफ्ले कावासोती नवलपुर ।
कावासोती–१५ स्थित चण्डेश्वरी माध्यमिक विद्यालयका विद्यार्थीहरूले आफूहरूले उत्पादन गरेको तिल बिक्रीमा राखेका छन् । विद्यालयमा सञ्चालन भइरहेको “सिक्दै कमाउँदै, कमाउँदै सिक्दै” कार्यक्रमअन्तर्गत विद्यार्थीहरूले खेती गरी उत्पादन गरेको तिल कावासोती–१७ गोछडामा जारी नगर स्तरीय आधारभूत तह खेलकुद प्रतियोगिता स्थलमा बिक्रीका लागि राखिएको हो ।

विद्यालयका प्र.अ लक्ष्मी न्यौपानेका अनुसार यस कार्यक्रमले विद्यार्थीहरूलाई आत्मनिर्भर बनाउन, सीपमूलक शिक्षा प्रवर्द्धन गर्न र स्थानीय उत्पादनको प्रयोगलाई प्रोत्साहन गर्ने उद्देश्य लिएको छ ।

शिक्षक राजु क्षेत्रीका अनुसार विद्यार्थीहरूले विद्यालयकै जग्गामा  तिल खेती गरेर उत्पादन गरेका हुन् । स्थानीय अभिभावक, खेलकुदमा सहभागी विद्यार्थी तथा दर्शकहरूले विद्यार्थीहरूको यस पहलको प्रशंसा गरेका छन् ।

हाल कावासोती–१७ गोछडामा रहेको सरस्वती माध्यमिक विद्यालयको खेलमैदानमा नगर स्तरीय आधारभूत तह खेलकुद प्रतियोगिता जारी रहेको छ ।