सभामुखमा डीपी अर्यालको मात्रै उम्मेदवारी

काठमाडौं : प्रतिनिधिसभाको सभामुख पदमा राष्ट्रिय स्वतन्त्र पार्टी (रास्वपा) का उपसभापति डीपी अर्यालको मात्र उम्मेदवारी परेको छ।

तोकिएको समयमा अर्याललाई सभामुखमा निर्वाचित गरियोस् भन्ने एक मात्र प्रस्ताव दर्ता हुन आएको संसद सचिावलयका प्रवक्ता एकराम गिरीले जानकारी दिए।

निर्वाचन तालिका अनुसार आज बिहान ११ देखि दिउँसो २ बजेसम्म उम्मेदवारी दर्ताको समय तोकिएको थियो। रास्वपाको एकल बहुमत भएका कारण अरु कुनै पनि दलले सभामुखमा उम्मेदवारी नदिएका हुन्।

अर्यालयको प्रस्तावकमा रास्वपा सभापति रवि लामिछाने आफैं छन्। समर्थकमा सांसदहरू सोविता गौतम, डा.स्वर्णिम वाग्ले र सुनिल लम्साल रहेको प्रवक्ता गिरीले जानकारी दिए।

उनका अनुसार चैत २२ गते आइतबार बस्ने बैठकमा अर्याललाई सभामुख निर्वाचित गरियोस् भन्ने प्रस्ताव पेश हुन्छ। प्रस्तावकले प्रस्ताव र समर्थकले समर्थन गरेपछि एक मात्र प्रस्ताव दर्ता हुन आएकाले निर्विरोध निर्वाचित भएको घोषणा गरिनेछ।