कृष्ण मोटरमार्ग सहित विभिन्न योजनालाई बजेट माग

घिरिङ गाउँपालिकाका जनप्रतिनिधि सहित विभिन्न राजनीतिक दलका प्रतिनिधिले गाउँपालिकाको मुख्य मार्गको रुपमा रहेको कृष्ण मार्ग सहित अन्य विभिन्न योजनाकोलागि गन्डकी प्रदेश सरकार सँग माग गरेको छ ।

गाउँपालिकाका अध्यक्ष होमबहादुर थापाको नेतृत्वमा विहिबार गन्डकी प्रदेशका मुख्यमन्त्री सुरेन्द्र पाण्डेलाई भेट गरि कृष्ण मार्ग सहित अन्य सडक र गाउँपालिकाका विभिन्न योजनामा प्रदेश सरकारको तर्फबाट बजेट उपलब्ध गराउन माग गरेका हुन् ।

कृष्णमार्गले गन्डकी प्रदेश र लुम्बिनी प्रदेशको पाल्पा जोड्ने हुँदा उक्त सडकको निकै महत्व भएको भन्दै गाउँपालिकाको तर्फबाट उक्त सडकमा हालसम्म मुद्धाको कारण बजेट नपरेको र अहिले मुद्धा टुंगो लागिसकेको हुँदा सो सडक कालोपत्रेको लागि प्रदेश सरकारले पनि बजेट विनियोजन गर्नुपर्ने बताए ।

सो अवसरमा मुख्यमन्त्री पाण्डेले आगामी वर्षको बजेटमा घिरिङ गाउँपालिकाका योजनालाई समेट्ने प्रतिबद्धता जनाएका थिए । सो टोलीले आर्थिक मामिला मन्त्रालयका सचिव राजेन्द्रदेव पाण्डेलाई पनि भेट गरि बजेट विनियोजनको विषयमा छलफल गरेको थियो ।

सो भेटमा गाउँपालिकाकी उपाध्यक्ष राधादेवी अधिकारी, निवर्तमान गाउँपालिकाका अध्यक्ष रनबहादुर राना सहित अन्य जनप्रतिनिधि, राजनीतिक दलका प्रतिनिधि र सन्चारकर्मीहरुको पनि उपस्थिती रहेको थियो ।