शिव सरस्वती माध्यमिक विद्यालयको ४९ औँ वार्षिकउत्सवको कार्यक्रम सम्पन्न

ऋषिङ्ग 

गण्डकी प्रदेशका आर्थिक मामिला मन्त्री जीत प्रकाश आलेले गण्डकी प्रदेश सरकारले समानुपातिक विकासको अवधारणालाई अंगाली रहेको बताएका छन्। ऋषिङ्ग गाउँपालिका वडा नम्बर ८ स्थित शिव सरस्वती माध्यमिक विद्यालयको ४९ औं वार्षिक उत्सव कार्यक्रमलाई सम्बोधन गर्दै उनले यस्तो बताएका हुन् ।

आलेले प्रदेश सरकारले सडक सञ्जाल, शिक्षा, स्वास्थ्य, खानेपानी, स्वरोजगार, पर्यटन , उद्यमशीलतालाई विशेष प्राथमिकतामा राख्दै अगाडि बढिरहेको बताएका छन् । उनले श्रृङ्गपथ अदालतमा मुद्दा दायर भएकाले बाटो निर्माण हुन नसकेको बताएका छन् । उनले विपद् व्यवस्थापन मार्फत उक्त मार्गको मर्मत गर्ने तयारी भै रहेको बताएका छन् ।

यस्तै कार्यक्रमलाई सम्बोधन गर्दै ऋषिङ्ग गाँउपालिकाका अध्यक्ष राजेन्द्र कृष्ण श्रेष्ठले शिव सरस्वती माध्यमिक विद्यालयले ऋषिङ्ग  गापाकै अग्रणी शैक्षिक संस्थाको परिचय दिँदै आईरहेको बताएका थिए । श्रेष्ठले गाउँपालिकाले शिक्षा क्षेत्रलाई विशेष प्राथमिकतामा राख्दै आईरहेको बताएका छन् । उनले शिव सरस्वती माध्यमिक विद्यालयमा  सञ्चालित प्राविधिक शिक्षा तर्फ १८ महिने भेटेरिनरी प्रि डिप्लोमाले विद्यार्थीहरुलाई आकर्षण गर्नुपर्ने भएतापनि विद्यार्थीहरुको संख्या न्यून भै रहेको बताएका थिए । उनले विद्यार्थीहरुलाई प्राविधिक शिक्षाको महत्त्व बुझि प्रविधिक शिक्षा हासिल गरी स्वरोजगार बन्न सुझाएका थिए ।

विद्यालय व्यवस्थापन समितिका अध्यक्ष दान बहादुर श्रेष्ठको अध्यक्षतामा सम्पन्न कार्यक्रममा ऋषिङ्ग गाउँपालिकाका प्रमुख प्रशासकीय अधिकृत चिन बहादुर रानाभाट , शिक्षा युवा तथा खेलकुद शाखा प्रमुख सुवासचन्द्र रानाभाट , ऋषिङ्ग गा.पा वडा ८ का वडाध्यक्ष भरत कृष्ण श्रेष्ठ , वडा ७ का वडाध्यक्ष दुर्गा बहादुर थापा , जनज्योति क्याम्पसका क्याम्पस प्रमुख केशवराज काफ्ले लगायतले कार्यक्रमलाई सम्बोधन गरेका थिए । कार्यक्रममा विद्यालय प्रधानाध्यापक रमेश पुलामीले विद्यालयको प्रतिवेदन प्रस्तुत गरेका थिए । सो अवसरमा विद्यालयका संस्थापक प्रधानाध्यापक स्व शिवराज चन्दकी धर्मपत्नी खनु मायाँ चन्दद्वारा रु ३ लाख बराबरको अक्षयकोषको स्थापना गरिएको थियो । यस्तै उक्त अवसरमा विभिन्न सामाजिक संघसंस्थाद्वारा विद्यार्थीहरुलाई छात्रवृत्ति प्रदान गरिएको थियो ।