दाउरा तान्ने क्रममा नदीले बगाउँदा पुरुष बेपत्ता,खोजी कार्य तीब्र

दमौली । बाढीले बगाएर ल्याएको दाउरा तान्ने क्रममा बुधबार बिहान तनहुँमा एक पुरुष नदीले बगाउँदा बेपत्ता भएका    छन् ।

जिल्ला प्रहरी कार्यालयका अनुसार व्यास नगरपालिका–१ भादगाउँ निवासी ५५ बर्षका तालबहादुर थापा बेपत्ता भएका हुन् ।  सोही वडा स्थित छाब्दीखोला दोभानमा बाढीले बगाएर ल्याएको दाउरा तान्दै गर्दा अचानक नदीमा आएको भेलले बगाएको प्रहरीले जनाएको छ ।
नदीले बगाएका व्यक्तिको अहिले व्यापक खोजी कार्य भैरहेको तनहुँका प्रहरी नायव उपरीक्षक दीपक कुमार रायले जानकारी दिनुभयो ।  उहाँका अनुसार गएरातीदेखि अबिरल बर्षा परिरहेको र नदीमा पानीको बहाव बढेकाले खोजी कार्यमा कठिनाई हुने देखिएको छ ।

नदीमा बाढीले बगाएर ल्याएको दाउरा खोज्न नदी किनार आसपासका  मानिसहरुको बिहानदेखि नै भीड लाग्ने गर्दछ ।