हुप्सेकोटमा सूचनाको हक सम्बन्धि अभिमुखिकरण कार्यक्रम 

ज्ञानु पङेनी असार,  २३ गते 

नेपाल पत्रकार महासंघ,नवलपुरको आयोजना तथा हुप्सेकोट गाउँपालिकाको सहकार्यमा सुशासन प्रबद्र्धनका लागि जनप्रतिनिधि तथा कर्मचारीहरु लक्षित सुचनाको हक सम्बन्धी अभिमुखिकरण कार्यक्रम  आज भएको छ ।
हुप्सेकोट गाउँपालिकाको सभाहलमा भएको कार्यक्रममा नेपाल पत्रकार महासंघका  केन्द्रीय वरिष्ठ उपाध्यक्ष दिपक आचार्य र नेपाल पत्रकार महासंघ गण्डकी प्रदेश कोषाध्यक्ष रमेश बस्ताकोटीले सहजीकरण गर्नुभएको थियो । 
पारदर्शीता र सुशासन कायम गर्दै सेवा प्रवाह गर्नु स्थानीय सरकार र कर्मचारी , जनप्रतिनिधी सबैको कर्तव्य रहेको हुँदा सूचनाको हकका बारेमा सूसुचित हुनु आवश्यक रहेको भन्दै नागरिकले खोजेका के कस्ता सूचना उपलब्ध गराउने र के कस्ता सूचना दिन मिल्दैन त भन्ने बारेमा जानकारी प्रदान गर्नुभएको थियो । यस्तै सूचनाको हक सम्बन्धि नितिगत  व्यवस्था कस्तो छ , कसरी सूचना मागिन्छ र कति समय भित्र सूचना उपलब्ध गराउनुनपर्ने प्रावधान छ त भन्ने बारेमा समेत प्रष्ट पार्नुभएको थियो ।
कार्यक्रममा बोल्दै गाउँपालिका अध्यक्ष लक्ष्मीदेवी पाण्डेले  सूचना प्रवाह र सञ्चार माध्यमको बलियो उपस्थितीले नै सरकारलाई सफल बन्न र सुशासन कायम राख्न मदत गर्ने कुरामा जोड दिनुभएको थियो । उहाँले कुनै पनि सञ्चार माध्यमले उठाएका समस्याहरुलाई सकारात्मक रुपले हेर्नुपर्नेमा समेत  जोड दिनुभयो  । 
कार्यक्रममा गाउँपालिका उपाध्यक्ष पूर्णसिंह रानाले सूचनाको हक सम्बन्धि यसरी सूसुचित हुन पाउँदा  आफूहरुले धेरै कुरा जान्ने बुझ्ने अवसर पाएको बताउनुभयो ।
नेपाल पत्रकार महासंघ नवलपुरका अध्यक्ष श्रीराम सिग्देलले स्थानीय सरकाका काम कारवाहीप्रति सजग र सचेत बनाउनका लागि पनि यस किसिमका कार्यक्रमले मदत पुग्ने धारणा राख्नुभयो ।
कार्यक्रममा  हुप्सेकोट गाउँपालिकाका जनप्रतिनधिी , कर्मचारी तथा सञ्चारकर्मी र सरोकारवालाहरुको सभागिता रहेको थियो ।
नेपाल पत्रकार महासंघ नवलपुरका अध्यक्ष श्रीराम सिग्देलको अध्यक्षता तथा गाउँपालिका अध्यक्ष लक्ष्मी पाण्डेको प्रमुख  आतिथ्यतामा भएको कार्यक्रममा सचिव आशिस  रेग्मीले सहजीकरण गर्नुभएको  थियो ।