घिरिङ गाउँपालिकाद्वारा ५० करोड बजेट सार्वजनिक , कृषि, पुर्वाधार विकास र पर्यटनलाई मुख्य प्राथमिकता

घिरिङ गाउँपालिकाले आगामी आर्थिक वर्ष २०८३/८४ का लागि ५० करोड रुपैयाँ बराबरको बजेट पारित गरेको छ। गाउँसभाको २०औँ अधिवेशनबाट पारित बजेटले कृषि, पूर्वाधार विकास तथा पर्यटन प्रवर्द्धनलाई मुख्य प्राथमिकतामा राखेको गाउँपालिकाले जनाएको छ।

बुधबार आयोजित गाउँसभामा गाउँपालिका अध्यक्ष होमबहादुर थापाले आगामी आर्थिक वर्षको नीति तथा कार्यक्रम प्रस्तुत गर्नुभएको थियो भने उपाध्यक्ष राधादेवी अधिकारीले आय–व्यय विवरणसहित बजेट पेश गर्नुभएको थियो। गाउँसभाले नीति, कार्यक्रम तथा बजेट सर्वसम्मत रूपमा पारित गरेको जनाएको छ।

पारित बजेटमा भौतिक पूर्वाधार निर्माण, कृषि तथा पशुपालन प्रवर्द्धन, शिक्षा, स्वास्थ्य, खानेपानी, पर्यटन विकास, वातावरण संरक्षण तथा सामाजिक सुरक्षासम्बन्धी कार्यक्रमलाई प्राथमिकता दिइएको छ। स्थानीय उत्पादन वृद्धि, रोजगारी सिर्जना तथा आर्थिक गतिविधि विस्तारमार्फत गाउँपालिकाको समग्र विकासलाई गति दिने लक्ष्य बजेटले लिएको छ।

गाउँपालिकाले आगामी आर्थिक वर्षमा आन्तरिक आयतर्फ ६ करोड १८ लाख ५८ हजार रुपैयाँ संकलन गर्ने लक्ष्य निर्धारण गरेको छ। बाँकी स्रोत संघीय सरकार, प्रदेश सरकारबाट प्राप्त हुने वित्तीय समानीकरण अनुदान, सशर्त अनुदान, समपूरक तथा विशेष अनुदान र राजस्व बाँडफाँटबाट जुटाइने जनाइएको छ।

कृषि उत्पादन वृद्धि, ग्रामीण सडक स्तरोन्नति, खानेपानी तथा सरसफाइ, शैक्षिक गुणस्तर सुधार, स्वास्थ्य सेवा विस्तार र पर्यटन पूर्वाधार निर्माणलाई बजेटका प्रमुख कार्यक्रमका रूपमा समेटिएको गाउँपालिकाले जनाएको छ। साथै वातावरण संरक्षण, विपद् व्यवस्थापन तथा सामाजिक सुरक्षाका कार्यक्रमलाई समेत निरन्तरता दिइने उल्लेख गरिएको छ।

गाउँपालिकाका अनुसार पारित नीति तथा कार्यक्रमले स्थानीय स्रोत–साधनको अधिकतम उपयोग गर्दै दिगो विकास, सुशासन र सेवा प्रवाहलाई प्रभावकारी बनाउने लक्ष्य लिएको छ। बजेट कार्यान्वयनमार्फत कृषि, पर्यटन र पूर्वाधार क्षेत्रको विकासमा उल्लेखनीय उपलब्धि हासिल हुने अपेक्षा गरिएको छ।

बजेट प्रस्तुत गर्नु अघि स्थानीयतहहरुले नीति तथा कार्यक्रम प्रस्तुत गरि पारित गरेका थिए । घिरिङ गाउँपालिकाको आगामी आर्थिक वर्षको बजेट ५० करोड रहेको छ। घिरिङले आन्तरिक आय तर्फ ६ करोड १८ लाख ८६ हजार अनुमान गरेको छ । बजेटका श्रोत मध्ये गत वर्षको अल्या २ करोड, संघीयशर्सत अनुदान चालु १८ करोड १९ लाख, संघीय सर्शत अनुदान पुँजिगत ६२ लाख, संघीय समपुरक अनुदान २ करोड ५९ लाख, संघीयविशेष अनुदान पुँजिगत ९० लाख ५० हजार, संघीय वित्तिय समानीकरण अनुदान ८ करोड ७८ लाख, राजश्व बाँडफाँड ७ करोड ८५लाख रहेको छ ।